Годинава во рамки на 20-тиот ТАКСИРАТ ФЕСТИВАЛ, еден од најавтентичните автори во регионов, Рамбо Амадеус пред македонската публика конечно ќе го претстави неговиот веќе славен театарско-сценски перформанс „Вечер на гломазна поезија“ кој ќе се одржи на 3-ти декември во кино „Фросина“ во Младинскиот Културен Центар во Скопје.

Популарниот музичар и мултимедијален уметник Антоније Пушиќ повеќе познат како Рамбо Амадеус во овој уникатен проект ја претставува својата поезија во придружба на клавирскиот маестро Иван Алексијевиќ - Панчевац. Со ова гостување, македонската публика за прв пат ќе има прилика да ужива во театарско-сценската програма со трагикомична содржина, која претставува комбинација на неговата експресивна, метафорична, духовита и саркастична поезија, проза и филозофија, а со која тој веќе неколку години гостува ширум регионот и Европа, предизвикувајќи помешани чувства кај публиката која возвраќа со налети на смеа, скандирање, громогласни аплаузи, но и тага и загриженост.

Важејќи за еден од најоригиналните музичари на Балканот, Рамбо Амадеус со својот израз секогаш бил многу близок до театарската форма, а „Вечер на гломазна поезија“ тој самиот ја опишува како „единствена претстава која на лаконски, сликовит и непретенциозен начин го сецира општеството и поединецот кој се обидува да опстане во него и да го пронајде своето парче среќа“. Имено, тој со клавирската придружба на извонредниот Иван Алексијевиќ, ги чита, рецитира, прераскажува и модифицира „најгломазните“ текстови од својот голем опус, постојано восхитувајќи ја публиката со која воедно негува посебен однос во овој перформанс.

Атмосферата на „Вечер на гломазна поезија“, како што објаснува самиот Рамбо, е најблиска до она што денеска се нарекува стенд-ап комедија, „но е сепак малку е поизопачена и попрво би се кажало дека тоа е стенд-ап трагикомедија“!

Билетите се веќе пуштени во продажба и во многу лимитиран број можат да се купат преку продажната мрежа на МкТикест по цена од 500 денари.

ТАКСИРАТ ФЕСТИВАЛ со задоволство го најавува следниот настан за одбележување на годинашното јубилејно 20-то издание, на кој во соработка со МКЦ Скопје, за прв пат пред македонската публика ќе настапи легендарниот јамајкански бенд INNER CIRCLE!

Прославувајќи ја 50-годишнината од своето постоење, Греми лауреатите Inner Circle ќе настапат на 29-ти јуни во МКЦ Скопје (плато), во рамките на нивната светска турнеја. Ова е единствена прилика да се види во живо култната реге-поп атракција и непосредно да се вкусат нивните хитови: “Sweat”, “Bad Boys”, “Rock with You”, “Games People Play”, “Young, Wild & Free”, “Tenement Yard” (неодамна семплувана од Jay-Z) итн.

Концертот ќе се одржува со бесплатен влез, а за присуство посетителите само треба да донесат едно пластично или стаклено шише бидејќи во оваа роденденска прослава ни се придружува и „Пакомак“ долгогодишниот еколошкиот партнер со кој ТАКСИРАТ редовно се залага добрите еколошки навики да станат дел од музичките збиднувања.

Реге иконите годинава го одбележуваат нивното 50-годишно творештво со промоција на документарен филм, книга и албум под наслов “A Long Road to Success”. Квинтетoт од Јамајка е еден од најголемите светски реге бендови чиј успех кулминираше кон средината на седумдесеттите. Inner Circle се, пред сè, заслужни за креирање специфичен стил на поп-ориентиран јамајкански ритам и енергија што ги етаблираше во водечки ѕвезди на ова движење. Редовно настапуваат на најголемите светски фестивали, како хедлајнери, заедно со бројни музички гиганти како: Зиги Марли, Лорен Хил, Елтон Џон, Ван Морисон, Џими Пејџ, Роберт Плант, Карлос Сантана и многу други. Предводен од основачите, браќата Роџер и Јан Луис, бендот го издржа тестот на времето континуирано иновирајќи го своето творештво и соработувајќи со растечките ѕвезди на светската музичка сцена. Питбул, Ченс д Рапер, Фло Рида, Рик Рос и ДЈ Калед се само некои од поп ѕвездите со кои тие соработуваа во последниве неколку години.

Потсетуваме, ТАКСИРАТ годинава го одбележува својот 20-ти јубилеј со голем број концерти во Скопје кои ќе се одржуваат во текот на целата година, а во рамки на прославата за „20 години алтернатива во Македонија“ претходно веќе се одржаа повеќе исклучителни концерти и настапи и тоа на КРАФТВЕРК, ЛАЈБАХ, ЛОРД ОФ Д ДЕНС, АКУА НАРУ, ГОГОЉ БОРДЕЛО, МАиКА и ПИТЕР БЕНС.

Атрактивното психоделично-шаманско трио MY BABY е најновото име што го потврди своето учество на Д Фестивал 2018 придружувајќи се кон импресивната листа на изведувачи. Стационирани во Амстердам, им беа потребни само три години за да го привлечат вниманието на светската критика, фестивалите и публиката. Денеска нивните настапи во живо се омилени на фестивалските бини низ Европа, за што сведочат дури шест настапи на гигантскиот Гластонбери и исто толку номинации и награди за „Најдобар албум“ и „Најдобар изведувач во живо“. Сепак, нивниот експресен успех не е случаен. Братско-сестринскиот тандем Шеик Ван Дајк (тапани) и Като Ван Дајк (вокали)  и новозеландскиот гитарист Даниел „Да Фриз“ Џонстон работеа интензивно и прекувремено да ја достигнат проектираната замисла за креирање возбудлив звук составен од мочуришни блуз и фанки влијанија, хипнотички битови, треперливи соул вокали и психоделични гитарски рифови.

Видео: MY BABY - Uprising

Претставувајќи го материјалот од своите 3 албуми („Loves Voodoo!“, „Shamanaid“ и „Prehistoric Rhythm“), концертите на МY BABY стекнаа репутација на вистински моќно вуду транс искуство коешто го искуси публиката во Европа, Азија, Нов Зеланд, Австралија и САД. Нивната оригиналната уметничка визија, во која се проникнуваат влијанијата на духовната музика (госпел и вуду обредите) и шаманистичките ритуали, најдобро може да се почувствува во живо, за што сведочат бројните суперлативи искажани во рецензиите и извештаите за нивните настапи на најпрестижните светски фестивалски и концертни подиуми. Ова лето на 8-ми јули на главната бина на Д ФЕСТИВАЛ македонската публика ќе има премиерна прилика да провери зошто музичките професионалци и публиката ги сметаат MY BABY за фестивалски „must see“.

Годинашниот Д ФЕСТИВАЛ ќе се одржува од 6-ти до 8-ми јули во Дојран и со потврдениот настап на MY BABY музичката програма на Фестивалот веќе брои повеќе од 40 учесници меѓу кои PAUL VAN DYK, АРХАНГЕЛ, DISCIPLES, FINK, SEVDALIZA, ДУКЕ БОЈАЏИЕВ, PUSSY RIOT, ГОРАН ТРАЈКОВСКИ, SMUT, SONIC SPECIES, WHO SEE, TRAP DA FUCK UP, FRENKIE, КУЛТУРНО УМЕТНИЧКИ РАБОТНИЦИ, BRKOVI, HELEM NEJSE, ГОЦЕ САФ, ЧВАРЕ, СТАРЈК, KOALA VOICE и многу други, а листата продолжува секојдневно да се надополнува. Но тридневниот музички маратон не е единствениот дел од овој уникатен настан, па за време на Д ФЕСТИВАЛ публиката во Дојран ќе има привилегија да биде дел и од раскошната културно-уметничка програма која се одвива во повеќе од 10 различни Фестивалски зони каде што Д ФЕСТИВАЛ ќе биде домаќин на повеќе од 100 учесници и гости.

ПОБРЗАЈТЕ ЗА НАЈПОВОЛНИТЕ – РАН КОРМОРАН ВЛЕЗНИЦИ
Во сите продажни места на МкТикетс, како и онлајн преку овој линк, веќе се спроведува РАН КОРМОРАН акцијата на Д Фестивал во чии рамки се продаваат фестивалските (тридневни) билети по нивната најповолна цена и тоа:

- ФЕСТИВАЛСКИ БИЛЕТ (три дена, без кампување) – 600 денари;
- ALL-INCLUSIVE БИЛЕТ (три дена, со кампување) – 650 денари.
(*двата типа на билети овозможуваат пристап до комплетната тридневна програма)

Д ФЕСТИВАЛ годинава има чест повторно да биде домаќин на македонскиот музички великан, бендот АРХАНГЕЛ кој го пречекуваме како предводник на главната бина на Фестивалот! Легендарната рок група чиј врвен музички квалитет е константа низ повеќе од три децении, е едно од најголемите музички имиња од нашата сцена на сите времиња, а посетителите на Д ФЕСТИВАЛ ова лето ќе имаат прилика да бидат дел од нивниот настап кој ќе се одржи на 7-ми јули во Дојран! Со завидна колекција на антологиски хитови и албуми кои ја одбележуваат македонската сцена уште од деведесеттите години, АРХАНГЕЛ константно ја потврдува својата музичка величина и ненадминливоста на музичките граници кои ги поставува и тоа не само кај нас туку во рамките на целиот регион! Овој пат на Д ФЕСТИВАЛ почестени сме со поинаква програма и концерт кој групата цени дека го должи на публиката поради временските услови од минатата година во Дојран, а што е подготвено од музичката работилница на култниот АРХАНГЕЛ е изненадување кое посетителите на Фестивалот имаат привилегија да го искусат во саботната вечер, 7-ми јули на главната бина на Д ФЕСТИВАЛ!

АРХАНГЕЛ, како никој друг, постигна култен статус не само кај нас, туку ширум цела поранешна Југославија. Групата оформена во 1988 година од страна на Ристо Вртев, во својата кариера има издадено четири албуми: „Архангел 1“ (1991), „Архангел 2“ (1993), „Heart Core“ (1998) и „Небесна машина“ (2003). Станува збор за едно од малкуте музички имиња кои со своето творештво оставија најзначаен белег на современата музичка сцена на Македонија и одбележаа генерации чија младост одекнува преку нивната музика, а на наше особено задоволство безвременоста на нивниот опус ова лето ќе одекне и на Д ФЕСТИВАЛ!

Д ФЕСТИВАЛ кој ќе се одржува од 6-ти до 8-ми јули во Дојран е единствениот летен музички фестивал на отворено во Македонија, кој во својата тридневна музичка програма покрај АРХАНГЕЛ веќе ги потврди и настапите на бројни музички ѕвезди од светската, регионалната и домашната сцена како што се PAUL VAN DYK, DISCIPLES, FINK, SEVDALIZA, ДУКЕ БОЈАЏИЕВ, PUSSY RIOT, ГОРАН ТРАЈКОВСКИ, SMUT, SONIC SPECIES, WHO SEE, TRAP DA FUCK UP, FRENKIE, КУЛТУРНО УМЕТНИЧКИ РАБОТНИЦИ, BRKOVI, HELEM NEJSE, KOALA VOICE, ПАЛИНДРОМ, CONSPIRACY, KI, ПОСЛЕДЕН УДАР, RGB, CUT YOUR NIPPLE, ANNA O, MAN IN A SUIT, REDUCED TO ASHES и уште многу други кои наскоро ќе бидат објавени.

Покрај музичката програма која се одвива паралелно на четири фестивалски бини, Д ФЕСТИВАЛ секоја година подразбира и раскошна разновидност на настани и случувања во дополнителната програма во ПлоштАРТ зоната и Фестивалскиот камп која вклучува филмски проекции, уметнички изложби и инсталации, работилници, дискусии, спортски активности и мноштво забавни содржини.

Пасворд Продакшн и бендот SMUT (Смат) со задоволство ви ја најавуваат промоцијата на новиот албум „Тие Се Насекаде“! Македонскиот метал-кор бенд кој е една од најценетите групи во овој дел од Европа и основоположник на овој стил во регионот, по точно 5 години работа на новиот материјал, промотивно ќе го претстави пред јавноста своето петто студиско издание. Промоцијата на „Тие Се Насекаде“ ќе се оддржи во просториите на „Password Place“ (ex JUICY bar), наспроти Италијанската амбасада во срцето на Скопје со почеток од 20:00 часот токму на денот од ослободувањето од фашизмот, на 9-ти мај.

„Во изработката на овој албум влеговме со цело наше срце со цел да ја доловиме сликата на случувањата во светот, но највеќе во нашата земја. Ситуацијата во која се наоѓаме и сѐ уште нѐ следи скоро 30 години како темен облак, верувавме дека треба да биде запишана и да се зборува за истата. Песните  да го имаат тој мрачен тон како во мелодиите така и во текстовите, а ритамот да е сведок на нашата упорност да преживееме во ова време невреме. Тргнувајќи од таа идеја снимивме 10 песни, кои тематски се преплетуваа и поврзуваат една со друга. Насловот на самиот албум (кој воедно е и песна од албумот) е директна инспирација од бендот Санаториум или поточно песната ‘Град’ (кој ја знае, знае за што зборуваме). ‘Тие се насекаде’ е дел од текстот на таа песна“ – изјавуваат момците од SMUT.

Тие се бенд кој секогаш со гордост говори за своите влијанија од македонската сцена. Истото го повторија и вметнувајќи ја реченицата „Мојот сон е само мој“ во нивната песна „Додека Сонував“ кој е наслов на истоимениот албум на групата SUNS (Санс) од Скопје, сѐ со цел да се задржи музичката историја и влијанијата на овој бенд.

„Се сложуваме дека тонот на албумот е малку помрачен, се согласуваме дека целата атмосфера е сива, но дали тоа не е вистинската слика која сакаме да ја насликаме за нашата заедничка реалност? Продукциски сакавме да направиме чекор напред од нашиот претходен албум, но како би го направиле тоа ако сте бенд од Македонија со буџет во тесни рамки? Со многу труд, жртва и нормално неизмерната поддршка од нашата публика која со секоја купена маица и карта за концерт нѐ донесе до моментот да снимаме со продуцентот кој работи со најголемите светски имиња во моментов“ – надополнуваат SMUT.

Албумот „Тие Се Насекаде“ е снимен во Поларити студио. За снимањето се погрижи Горан Ристевски, а микс и мастер беше изработен од греми номинираниот Ермин Хамидовиќ, добро познат на публиката по својата работа со бендовите Перифери, Хантед, Девин Таунсенд.
За самиот артворк на албумот се погрижи пријателот на Смат, Васил Васев од Бугарија кој е долгогодишен соработник на бендот и секогаш го доловува визуелниот аспект на Смат, кој за визуелната перспектива на новото издание објаснува: „Идејата зад насловната страна беше да се стават сите актери кои се директно поврзани со целата приказна вклучувајќи го и главниот лик Мерлин кој е заштитен знак на бендот повеќе од 10 години. Повеќето бендови од овој стил ставаат костури, демони како симболика, но ние сакавме да ги ставиме вистинските ликови на актерите и лицата што ни се познати! Доловувајќи го сето тоа во амбиентот од легендарната слика ‘Тајната Вечера’“.

Смат од материјалот кој го најде своето место на овој албум, досега објави два сингла „Што ако Ѓаволот си ти?“ и „Последниот Куршум“ кој излезе пред само неколу дена (на 27-ми април), а во моментот се работи и на првиот видео запис од албумот за песната „Во Мојот Град“.

Промоцијата на изданието кое излегува под Password records, е од отворен карактер.
SMUT постојат од 1996 година, албумот го снимија: Антовски Благоја, Најдовски Дарко, Иловски Ѓорќи, Неврус Бајрам, Горан Ристевски.

 

На 29-ти мај во Скопје, во рамки на ТАКСИРАТ 20 ќе се одржи концертот на еден од најимпресивните live бендови на денешницата GOGOL BORDELLO (Гогол Бордело), а оваа славеничка Таксират вечер во Младинскиот Културен Центар добива уште едно засилување кое доаѓа со гостувањето на MAiKA (Маика) - новиот музички феномен на регионалната сцена кој ќе настапи како специјален гостин на славниот џипси-панк бенд!

Бендот MAiKA кој пред некој ден и официјално го објави својот дебитантски албум „Balkannibalism“, ќе настапува како специјален гостин на Gogol Bordello на концертите од нивната турнеја во источна Европа, а станува збор за балкански алтернативен денс-панк бенд со членови кои доаѓаат од Србија, Хрватска и Црна Гора. Албумот првенец содржи 11 песни од кои повеќето на англиски јазик, а од ова издание бендот досега објави два сингла „River Sava“ и „Share of Your Life“. Нивната музика се темели на модерни ритми, женски панк вокали и луда сценска енергија. Комбинирајќи традиционална балканска музика, труби и хармоника со новите музички стилови (електронска, алтернативна денс, инди поп и панк музика), MAiKA создаваат автентичен звук, никогаш претходно чуен во регионов. Од перспектива (музичка и визуелна) на MAiKA, Балканот е апсурден микс на контрасти и го опишуваат како бизарна чорба од многу влијанија, стилови и култури, а токму тој е главната тема на музиката на MAiKA.

GOGOL BORDELLO пак, гостуваат премиерно во Македонија, во рамки на Seekers And Finders турнејата за истоимениот, нов албум. Комбинирајќи ги панк и ромската музика со хумор и ефектни, хаотични и енергични сценски настапи, Gogol Bordello ја раскажува приказната за имигрантите и дијаспората.

ВИДЕО: La Isla Bonita [featuring Gogol Bordello]

Со осумте досега студиски изданија, подоцна проследени со небројни турнеи, со незапирливиот продор на фронтменот Јуџин на уметничката и филмската сцена, како и поддршката од славните имиња на светската сцена, членовите на GOGOL BORDELLO со право важат за големи меѓународни музички ѕвезди кои од андерграунд легенди прераснаа во интернационален феномен. GOGOL BORDELLO е бенд за кој се вели дека постојано го истражува креативниот пекол и ја напаѓа човечката пасивност, бенд кој оди и чекор над музиката, над политичкото, насочувајќи го вниманието кон уметничката револуција на глобалното доба, а годинава кога ТАКСИРАТ слави 20 години алтернатива во Македонија, нивната нескротлива сценска енергија конечно ќе имаме прилика да ја доживееме и во Скопје. Неповторливиот еклектичен бенд гостува во Скопје промовирајќи го својот нов албум „Seekers And Finders“ објавен во август годинава, а кој се појавува четири години по студискиот претходник „Pura Vida Conspiracy“ (2013).

ТАКСИРАТ во 2018-та го прославува своето јубилејно 20-то издание со бројни настани во текот на целата година, а со концертот на GOGOL BORDELLO македонската публика има уште една загарантирано незаборавна славеничка вечер на 29-ти мај во МКЦ.

Влезниците за овој концерт се достапни преку продажната мрежа на МкТикетс и само во органичен број! Најповолната цена од 500 денари е ограничена само за првите 300 билети, а по нивното распродавање, вториот и третиот подеднаков контингент влезници ќе бидат достапни по цена од 600 и 700 денари.

Thursday, 26 April 2018 10:13

BRKOVI

Written by
07.2018 Macedonia D Festival, Dojran, MK
Thursday, 26 April 2018 10:12

SEVDALIZA

Written by
08.07.2018 Macedonia D Festival, Dojran, MK
Thursday, 26 April 2018 09:44

HELEM NEJSE

Written by
07.2018 Macedonia D Festival, Dojran, MK
Thursday, 26 April 2018 09:43

PAUL VAN DYK

Written by
06.07.2018 Macedonia D Festival, Dojran, MK