Суперхикс на еко-фестивалот Sound of Green

Суперхикс на еко-фестивалот Sound of Green

На 28 јуни, со почеток во 21 часот, на Градската плажа Камени мост (Летен камп Кастро), трета година по ред, ќе се одржи еко фестивалот „Sound of green“, во организација на Друштвото за управување со отпад од пакување – „Пакомак“ а во соработка со Пасворд продукција. Пред скопската публика ќе настапат едни од најдобрите македонски бендови: „Суперхикс“, „Паркети“ и DJ Goce D’Sauce.

Влезници за фестивалот нема да се продаваат, туку ќе се добиваат во замена за 3 празни пластични шишиња од која било големина. Сите што сакаат да бидат дел од оваа голема журка, треба да ги донесат собраните шишиња на пултовите на Пакомак пред влезовите на Градската плажа на кеј пред почеток на концертот, на 28 јуни и со тоа да си ја обезбедат својата влезница за овој несекојдневен музички настан.

„Спојот на музиката и грижата за животната средина се покажа како успешна формула за да ги поттикнеме младите на забавен начин да ја доживеат селекцијата на пластичниот отпад. Минатата година на овој фестивал имавме одличен одзив, очекуваме оваа година да имаме уште посилни позитивни рекации од публиката за чисто и поубаво Скопје. Континуирано ќе ги потсетуваме сите посетители да се однесуваат еколошки одгововорно и да ја чуваат нашата околина. Нашата цел е да ја подигнеме еколошката свест кај малдите и да покажеме дека собирањето на отпадот може да биде забавен чин и дел од секојдневието“- изјави Ико Брдаровски, оперативен директор во Пакомак.

Компанијата Пакомак неодамна потпиша договор за соработка со Пасворд Продакшн, според кој Пакомак ќе биде еколошки партнер на сите настани и концерти кои ќе бидат во наша организација. Со заеднички напори ќе се потрудиме добрите еколошки навики да станат дел од музичките збиднувања во Македонија, посетителите на настаните и учесниците да се однесуваат еколошки одговорно и во согласност со зaповедите за грижата на околината, што на крајот би влијаело за подигнување на колективната еколошка свест.

Бидете дел од овој настан зашто само заедно ќе го исчистиме Скопје од пластика, а ќе го „извалкаме со добра музика!