Д ФЕСТИВАЛ

Д ФЕСТИВАЛ

Password Production ја има честа да го најави второто издание на Д Фестивал, настанот кој со своето прво издание и одличната атмосфера ни остави незаборавни спомени од целовечерната забава на дојранското крајбрежје и нé задолжи за уште поголемо следно издание.

Израснат од идејата за уникатен open-air музички хепенинг кој ќе понуди алтернатива за згаснување на жедта за квалитетен летен фестивал и тоа на автентичното дојранско крајбрежје, Д Фестивал на најдобар начин веќе ја потврди и ја оправда својата иницијатива. Првиот Д Фестивал се одржа во совршена атмосфера која постојано беше доведувана до еуфорија и целовечерен драјв на позитивна енергија за која допринесоа илјадниците фанови и најквалитетните артисти на домашната рокенрол и електронска сцена, Кирил Џајковски и Суперхикс, диџеите Владич и Никифор. Годинава Д Фестивал продолжува со уште поголеми очекувања, сигурно остварувајќи ја целта да прерасне во симбол на незаборавно концертно доживување и традиционална дестинација за фановите на автентичниот летен фестивалски дух.

Д Фестивал 2012 ќе се одржи на 28-ми јули во Дојран, а од годинашниот лајн-ап, првото име кое го објавуваме се милениците на македонската публика С.А.Р.С., артистите препознатливи по секогаш одличната забава на нивните концерти. Српскиот алтернативен бенд прерасна во едно од главните музички имиња на т.н. Нова Српска Сцена. Една година по оформувањето, во 2006-та во Белград, групата ја објави првата песна „Буѓав Лебац“, која постигна неверојатна популарност во екс-Ју регионот. Овој успех се смета за посебен феномен, имајќи предвид дека стануваше збор за целосно анонимен бенд без финансиска поддршка и класична медиумска промоција. Во 2009-та следи С.А.Р.С. албумот и хит-сингловите како „Дебели лад“, „Ратујемо ти и ја“, „Ракија“, „Будим се“. Минатата година групата беше актуелна и со новиот албум „Перспектива“, а бендот во Македонија ја освои и „Златна Бубамара“ наградата за Најдобар балкански рок албум. По стотици одржани концерти, С.А.Р.С. денес е еден од најбараните авторски бендови на екс-Ју просторите и име кое е гаранција за одлична концертна журка.

SARS-resize

Со С.А.Р.С. најавуваме само еден дел од она што годинава го подготвува Д Фестивал, а наскоро очекувајте ги и останатите артисти од годинашниот лајн-ап кои ќе се погрижат за уште едно незаборавно фестивалско издание.

Д Фестивал ќе се одржи на просторот на паркингот Гранит во Дојран, кој нуди идеални услови за одржување на масовен музички хепенинг на дојранското крајбрежје. Просторот има вкупен капацитет од 10.000 посетители и се наоѓа помеѓу Нов и Стар Дојран, во близина на плажата, а сето тоа гарантира несекојдневна можност за забава до утринските часови сред подзаборавените убавини на овој регион. Подгответе се за одлична забава, извонредно искуство со најдоброто од современата музичка сцена и сет листи за целовечерно лудување и многу насмевки.
Билетите за Д Фестивал 2012 можете да ги најдете во продажната мрежа наМКтикетс. Цената на билетите во претпродажба е 250 денари, а билетите кои ќе се продаваат на билетарата на Д Фестивал ќе чинат 300 денари.